Xalilakchiwin
Tu lilakaxlakgonit nak 2016 amakgolh Xlikalanka Xtamakgstokgotkan Laklanka Kachikinin tu Akxtum Talanit, pi ama 2019 wa Xlikalanka Xkatakan amakgolh Xalakgmakgan Tachiwin, wa uma xlakata likgantaxtulh ama taskujut tu litapakuwi Xlikalanka Tamakxtumit tu Limalakgastakwanikan Xalakgmakgan Tachiwin nak América Latina: Xalakwan Takatsin.
Lata xkgalhkaw chu xkgalhakawitu octubre xla 2018 tatamakxtumikgolh nak Cochabamba (Kollasuyu, Bolivia) amakgolh xalakgmakgan kachikinin tu akxtum talamana, makgalhtokgenanin, putsananin chu pukgalhtawakga xalak Abya Yala ti sakstukan taliskujmana laki ninalakgsputa xalakgmakgan tachiwin.
Uma lanka Tamakxtumit wa tamakgantaxtilh ama Fondo para el Desarrollo de los Pueblos Indígenas de América Latina y el Caribe (FILAC) chu ama Programa de Formación en Educación Intercultural Bilingüe para Países Andinos (PROEIB Andes), nachuna ama Ministerio de Educación chu Ministerio de Relaciones Exteriores, Viceministerio de Interculturalidad xalak Bolivia chu Organización de Estados Iberoamericanos para la Educación, la Ciencia y la Cultura (OEI).
Talichiwinalh xtaskujutkan ama México, Guatemala, Nicaragua, Ecuador, Perú, Brasil, Bolivia, Chile chu Argentina ti palakatekgolh xalakgmakgan xpulatamankan lama Tutunaku, Mazahua, Mazateco, Chinanteco, Tsotsil, Náhuatl, P’urhépecha, Paunaca, Aymara, Quechua, Guaraní, Mapuzugun, Maya, Shipibo chu Qom, chuna pulh lilakchiwinanka Xalilakgachixkuwin tu lakgatum limastakwanikan tachiwin chu tasmanin tu anankgo nak xlikalanka, nachuna lichiwinanka pi xlakaskinka amakgolh xalakgmakgan tachiwin xlakata anta anankgoy xalakgmakgan takatsin, tapuwan, chu tipalhuwa tu tamakglhkatsiy, tu lilakapastaknankan chu lilatamakan lata xlakgasi latamananin chu katuxawat.
Alistalh kalichiwinanka taskujut tu kalimastakwanikan xalakgmakgan tachiwin, umakgolh taskujut chune kilikgantaxukgoy: Xtaskujutkan pukgalhtawakga nak xtaputsankan chu lata lilakaxlakan laku katsokgkan tachiwin, taskujut tu akxtum limakgantaxtikan takgalhtawakga, taskujut tu limatliwekglhkan tachiwin chu tu litalakgapaskan akan kalitamaklakaskinkan tipalhuwa pumakatsinin TICS chu laku kamasinikan makgalhtokgenanin, nachuna tu xtaliteykan makgalhtokgenanin akan kaliskujkan chu kamuxkanikan tasmanin chu tachiwin.
José López Tirzo
